1. 3. 2020: Сербска міністерка Чоміч навщівила Націоналный совіт Русинів

В пятніцю, 26-го фебруара 2021-го року, сербска міністерка про людьскы права, права меншын і соціалный діалоґ, Ґордана Чоміч, вєдно із своїма сполупрапрацовниками, меджі котрыма была і державный секретарь резорту Олена Папуґа, навщівила централу Націоналного совіту Русинів в Руськім Керестурї.

О нащіві міністеркы інформовав портал Радіо-Телевізія Войводины. Чоміч моментално навщівлює совіты окремых меншын, котры жыють в Сербії.

На робочій стрїчі председове одборів про інформованя, културу, освіту і урядне вжываня языка і писма на челї з председом Націоналного совіту Русинів Бориславом Сакачом споминали актуалны проблемы, з котрыма ся стрїчають при своїй роботї. Говорило ся і о демоґрафічній а економічній сітуації в Сербії.

Як єден із способів вырїшіня проблем міністерка Чоміч підкреслила соціалный діалоґ. Спомянула і важность списованя жытелїв, котре і в Сербії має проходити в тім році. Додала, же ку списованю треба приступати без страху, формуларї будуть безпечны і русиньскый язык буде єдным із 13-ёх урядных языків, в котрых буде списованя проходити. Ґордана Чоміч акцентовала, же списованя є важным, бо од ёго резултатів буде залежати політіка в слїдуючіх десятёх роках.

Навщіва міністеркы Чоміч в Націоналнім совітї Русинів была реалізована в рамках пожадавкы членів Коордінації націоналных совітїв, котра была высловлена на першій сполочній стрїчі із представителями новоформованого Міністерства про людьскы права, права меншын і соціалный діалоґ в новембрї попереднього року.

Петро МЕДВІДЬ, ЛЕМ.фм, языкова управа: ред. АРК в СР, жрідло фотоґрафії: Рутенпрес