1. 3. 2020: Запиште ся карпатьскыма Русинами, апелують америцькы Русины

Каждый ся рахує! То гесло кампанї, з котров приходить Карпаторусиньскый научный центер в Споєных штатах Америкы перед списованём населїня. В Споєных штатах списованя людей проходить вже тот рік. Од 1-го апріля 2020-го року бы поступно мали люди діставати формуларї, в котрых будуть записовати свої даны. Окрем іншого можуть зазначіти і свою народность.

Цензус в США

Цензус в Споєных штатах Америкы так, як і в далшых держвах, проходить раз за десять років. Покля в европскых державах є списованя населїня, аж на дакотры выняткы як Україна, напланованый на 2021-ый рік, жытелї Споєных штатів ся будуть раховати вже тот рік.

Фурмуларї будуть выповняти обчане США, обчане іншых держав, котры мають леґалну резіденцію в штатах, довгодобы навщівници, котры не суть обчанами, але і нереґістрованы іміґранты.

Запиште ся карпатьскыма Русинами

Карпаторусиньскый научный центер вже зачав імейлову кампань перед списованём населїня, в котрій апелує на людей, жебы записали ся як Carpatho-Rusyn.

Творцёве кампанї далше звертають увагу на то, же покля ся люди в односній колонцї запишуть іншаков назвов, наприклад Slavic, Lemko, Carpatho-Russian або Ruthenian, не є ґарантоване, же будуть прирахованы ку карпатьскым Русинам. В кампанї ся акцентує, же записати ся як карпатськый Русин є і офіціалнов позіційов Карпаторусиньского конзорціюма Северной Америкы.

В Споєных штатах Америкы є подля одгадів професора Павла Роберта Маґочія од 600 000 до 800 000 людей русиньского походжіня. За остатнїм списованём ся там ку русиньскому походжіню приголосило лем 8 934 людей.

Карпаторусиньскый научный центер

Карпаторусиньскый научный центер є наукова інштітуція і выдавництво в Споєных штатах Америкы. Засновав го у 1978-ім роцї професор Павел Роберт Маґочій. Почас свого єствованя выдав множество публікацій, брожур, мап. Од 1978-го до 1997-го року выдавав свій каврталник Carpatho-Rusyn American.

Центер забезпечує штіпендії про штудентів і науковцїв, котры занимають ся проблематіков карпатьскых Русинів. В роках 1993 аж 1995 рядив Фонд про русиньску молодеж Югославії. Од 1997-го року передавав Премію Александра Духновіча за русиньску літературу.

Петро МЕДВІДЬ, ЛЕМ.фм