1. 2. 2019: Заколядуют для нас чысленны пастушкы, ангеликы та і чорт з Жыдом

Як каждого рока, на зламі січня/лютого Стоваришыня Руска Бурса орґанізує подію, завдякы котрій, уж при кінци святочного періоду, мож іщы почути різдвану атмосферу. Разом з чысленныма пастушками, ангеликами, чортами, Жыдом, царями і цілом рештом вертеповой дружыны буде нагода поколядувати.

8. лютого/фебруара 2019 рока в Ґорлицкым Центрі Культуры пройде Лемківскє Колядуваня. Є то шторічный Перегляд Колядничых Ґруп, котрый циклічні орґанізує ґорлицка Бурса. Участ возмут ученикы зо шкіл ґорлицкого повіту – бесідує Моніка Тылавска, координатор подіі. Вартат прити тіж зато, же премєру буде мала міні-Терочка, котра од недавна вчыт ся при бурсі. Старша же ґрупа першый раз запрезентує гуляня. Запрашаме особливо вшыткы бабы, дідів, мамы і нянів – продолжат.

Каждорічні запрашаны сут вшыткы школы, де вчыт ся лемківского языка. Участ потвердили ученикы од пані Варвары Дуць, то є зо шкіл в Ґладышові і Устю Рускым. Окрем того з ґрупом приіхат учытелька Анна Рыдзанич, а з наймолодшыма колядниками з Бодаків – учытелька Орина Гутиряк.

Од минулого рока колядуваня перенесло ся з Руской Бурсы до Ґорлицкого Центру Культуры, а то з огляду на збільшаючый ся розмір подіі. Поділити ся святочным вертепом приізджат уж коло соткы діти, через што тяжко помістити ся в бурсяных просторах. Наша бурса є місцьом де є тот особливый лемківскій климат, але будеме ся міцно старати, жебы і в Ґорлицкым Центрі Культуры почути того лемківского духа – кінчыт М. Тылявска.

Наталія МАЛЕЦКА-НОВАК, лем.фм

(Публікуєме в оріґіналї – лемківскім варіантї русиньского языка.)