1. 2. 2017: Андрій Ґай бы мав 85 років

29-го януара минуло 85 років од народжіня русиньского маляря, ілустратора і педаґоґа вытварного уменя Андрія Ґая. Векшыну свого жывота пережыв родак із Сукова в Пряшові.

 

Народив ся Андрій Ґай у Сукові, в окресї Гуменне, 29-го януара 1932-го року. Закінчів руську ґімназію в Гуменнім і далше штудовав у рр. 1952 – 1958 на Высокій школї вытварных умень в Братїславі. По абсолвованю высокой школы зачав робити в Пряшові як вытварный редактор україньской ґазеты Дружно вперед. В рр. 1960 – 1973 робив на Педаґоґічнім інштітутї і Катедрї вытварной выховы Педаґоґічной факулты Універзіты Павла Йозефа Шафарика в Пряшові.

 

Од 1973-го року быв свободным умелцём. Курто учів і на Народній школї уменя і знова і на Катедрї вытварной выховы. Малёвав головно пейзажі, портреты, фіґуралны композіції, закутя країны. В періодї років 1960 – 1990 вытворив множество монументално-декоратівных творів у архітектурї, малеб на стїну, камянных і керамічных мозаік.

 

Андрій Ґай мав веце як 50 окремых і взяв участь на коло 150 колектівных выставках. У 1987 роцї здобыв медайлу За розвиток окресу Пряшів. В тім самім роцї му была передана в Кошіцях Премія крайского народного выбору за камянну мозаіку. Із нагоды ёго 80-ой річніцї од народжіня му у 2012-ім роцї была передана Цїна пріматора міста Пряшів за довгорічный і вынятковый вклад у области вытварного уменя і репрезентацію міста дома і за граніцями.

 

Наперед Андрій Ґай выставлёвав дома і за граніцями як словацькый або україньскый умелець, по 1989-ім роцї приєднався до ку далшым пряшівскым умелцям на выставках русиньского уменя.

 

Андрій Ґай умер перед нецілым роком, 15-го фебруара 2016-го р. в Пряшові. Мав 84 років.

 

П. М.