1. 12. 2021: В Мукачові бісїдовали о ролї містных еліт і інтеліґенції в розвитку державы. Припомянули Русинів і референдум

В рамках округлого стола бісїдовало ся о референдумі з 1991-го року, і узнаню Русинів.

Як інформовав Степан Сікора на порталї Mukachevo.net, 26-го новембра 2021-го року в Мукачові одбыв ся округлый стіл на тему Роль містных еліт і інтеліґенції в розвитку державы.

Округлый стіл быв орґанізованый председом Закарпатьского оддїлїня Общества адвокатів Україны Ларисов Холмогоровов і председом Рады адвокатів Закарпатьской области Олексіём Фазекошом. На події взяли участь знамы адвокаты з области, посланцї Закарпатькой областной рады, журналісты, блоґеры і гостї.

Меджі участныма были і представителї русиньского руху на Українї, як наприклад шефредактор порталу Фенікс – Слово Степан Сікора, і председа Народной рады Русинів Закарпатя Євген Жупан. Тоты на округлїм столї одкрыли і тему Русинів а референдума з 1-го децембра 1991-го року, котрого резултаты доднесь не были выповнены.

Люде голосовали за самосправну теріторію

„1-го децембра 2021-го року буде 30 років од всеукраїньского референдуму, на котрім майже 98 процент Закарпатцїв повіло ‚так‘ незалежнїй Українї, і майже 78 процент заголосовало за ‚самосправну теріторію Закарпатя в складї Україны‘. Парадокс? Нїт. Закарпатцї, і то Українцї, Росіяне, Русины, Мадяре, Румуны, захотїли жыти в незалежній, демократічній державі Українї, і жебы ‚центер‘ то решпектовав і дав можности нашій области розвивати ся з оглядом на шпеціфікы реґіону,“ повів Сікора на округлім столї.

Сікора думать, же реґіон Закарпатьской области, котрый має граніцю із штирёма країнами Европской унії, треба поважовати за якусь основну базу, з котрой почінать „европска Україна“.

„Потребным є злїпшовати економічну, гуманітарну інфраштруктуру области. Не є тайным, же выше 60 процент роботыспособного і інтелектуалного населїня краю робить за граніцёв, а має робити дома,“ продовжовав Сікора.

Узнаня Русинів підниме авторіту Україны

Заслуженый лїкарь Україны, кандідат медициньскых наук і председа Народной рады Русинів Закарпатя Євген Жупан обернув увагу на проблему того, же Русины не суть узнаны на Українї.

„Русины як народность суть узнаны в Европі і у світї, а лем на Українї їх не видять. Вырїшіня ‚русиньского проблему‘ лем підниме авторіту Україны як европской державы,“ повів Жупан. Як далше высловив ся на округлім столї, Закарпатя є єдиным реґіоном Україны, де в мірї і злагодї вже тісячі років жыють представителї выше трёх десяток різных етнічных ґруп.

Петро МЕДВІДЬ, ЛЕМ. фм. Ґрафічна і языкова управа: ред. АРКв СР. Фото: Степан Сікора / Mukachevo.net.