1. 12. 2020: Архієпіскоп Кіріл Василь прияв представителїв ОСЙК

26-го новембра 2020-го року прияв архієпіскоп Кіріл Василь, апостольскый адміністратор Кошіцькой єпархії в просторах Ґрекокатолицького єпархіалного уряду в Кошіцях представителїв Общества святого Йоана Крестителя (ОСЙК). Пресовый центер Кошіцькой єпархії о тім інформовало ОСЙК.

Была то перша стрїча представителїв того общества, котре розвивать освітнє діятельство меджі ґрекокатолицькыма русиньскыма віруючіма на теріторії Словакії, з владыком Кірілом (на фотцї в центрї), одколи быв призначеный у януарї 2020-го року за апостольского адміністратора sede plena Кошыцькой ґрекокатолицькой єпархії.

Участныма стрїчі были священици Ярослав Поповець (другый справа), Мартін Костілник (першый справа), Мілан Ясик (другый злїва) і Іван Барна (першый злїва). Владыку Кіріла поінформовали о актівностях, піблікачнім діятельстві і планах общества. ОСЙК хоче выдати русиньскый молитвенник під назвов Радуйте ся в Господі. До друку є приготовленый і русиньскый переклад цїлого Нового завіта.

Кошіцькый апостольскый адміністратор священиків повзбудив ку далшому діятельству ОСЙК про духовне збогачіня русиньскых ґрекокатолицькых віруючіх, выразив їм свою підпору і дав своє благословлїня. Припоминаме, же в септембрї владыка Кіріл призначів у Кошіцькій єпархії вікарів про Мадярів, Русинів і Українцїв.

На память першой стрїчі представителїв Общества святого Йоана Крестителя з владыком Кірілом передав апостольскому адміністраторови властноручно вырізовану ікону святого Дамаскіна отець Ярослав Поповець, котрый є довгорічным председом общества. На стрїчі брав участь і отець Кассіан Каміл Дрозд, вікарій про русиньскых і україньскых віруючіх Кошіцькой єпархії.

Петро МЕДВІДЬ, лем.фм, фото: ОСЙК, языкова управа: ред. АРК в СР.