1. 12. 2016: В Снинї будуть выставлёвати кірілічны памяткы

„Хліб душі“ – таку має назву выставка, котру приготовлює Містьскый културный і освітній центер у Снинї вєдно із Обществом сел мікрореґіону Улічска долина і безпрофітовов орґанізаціов Карпатьскы деревяны церькви. Выставка буде презентовати кірілічны памяткы сниньского реґіону.

Выставка буде мати свою вернісаж в пятніцю 16-го децембра 2016-го року о 17.00 год. в просторах сниньского каштелю і буде єй мож відїти аж до 6-го фебруара 2017-го року. Куратором є Мірослав Бураль. Одборно на тій выставцї сполупрацовали Даніела Капралёва і Даніела Ґаландова.

В рамках одкрытя выставкы буде мож выслухати і лекцію Мірослава Бураля під назвов Кірілічны памяткы сниньского реґіону і їх обновлёваня. О святочный музичный проґрам на одкрытю постарать ся хор Православной парохії в Снинї.

П. М.

Script logo