1. 11. 2019: Рутенія на выходї Словакії представить Землю обіцяну

Русиньскый фолклорный ансамбель Рутенія з Братїславы ся почас осени представить на выходї Словакії із своїм найновішым проґрамом, котрый дістав назву Земля обіцяна. Іде о танечно-драматічну інсценацію, в рамках котрой можете відїти на сценї і познаты твари акторів.

Остатнїй раз робила Рутенія подобне турне на выходній Словакії з проґрамом Русиньске сердце у 2016-ім роцї.

 

Іншпірованы оптаціями

Інсценація Земля обіцяна мала свою премєру в попереднім роцї, но концепчно пєса зачала рихтовати ся омного скорїше.

Земля обіцяна приближує публіцї дії, котры в Чехословакії проходили по Другій світовой войнї. Іде о такзваны оптації, в рамках котрых ся тісячі людей, главно русиньской народности з выходной Словакії, на основі лживой пропаґанды добровольно приголосили выселити ся на теріторію Совєтьской Україны. Своїм підписом і перекрочінём граніць пришли о свій маєток, чехословацьке гражданство, але на україньскій теріторії їх не чекав рай, о котрім їм аґітаторы бісїдовали, і которму хотїли віровати. Наопак, чекав їх векшынов омного тяжшый жывот, як дома, нераз діскрімінація ці перзекуції. Но нихто з них не доказав забити в собі надію, же раз вернуть ся домів. Першы реоптанты зачали вертати ся в 1960-ых роках, тоты остатнї, котры вырїшыли вернути ся, дістали можность у 1990-ых роках.

Драматічно-танечна інсценація Земля обіцяна не має цїль точно документовати тоты історічны дії, і кедь в дакотрых моментах выходить із конкретных жывотных історій. Є скоріше історіёв обычайного чоловіка, котра ся вже тісяч раз одбыла ся і знова може одбыти. Єдночасно інсценаторы грають ся з біблічныма сімболами обіцяной землї і строму, котрый представлює жывот, і через історію главного героя представлюють долю цїлого народа і ёго гляданя выхыреной землї, богатой на молоко і мед, котру по вшыткых страстях находить там, де жыли ёго предкове цїлы ґенерації.

З мотівом інсценовати тоты смутны дії русиньской історії пришов ведучій ансамблю Петро Штефаняк, котрый вєдно із сполупрацовниками – Катаринов Бабчаковов, Славоміром Ондейком, Аґатов Краусовов і Михалом Ноґом обробили тему і на основі етноґрафічного бааня приготовили танечны хореоґрафії. Сценарь написав Петро Медвідь, котрый єдночасно цїлу інсценацію режіровав.

 

На сценї і познаты твари акторів

Земля обіцяна была про Рутенію вызвов. Першый раз ансамбель приготовив інсценацію, котра не є чісто танечна. То собі выжадовало і сполупрацу далшых партнерів.

Головны роли реоптанта і аґітатора, котры по роках стрїчають ся коло строму, котрый сімболізує жывот, но і місце закорїнїня, дістали акторы Йосиф Пантлікаш і Володимір Чема. Тых публіка годна знати головно з інсценацій русиньского Театру Александра Духновіча в Пряшові, але і з різных телевізных і філмовых проєктів. Музичну часть почас выходословацького турне творять музиканты з Народной музикы Радослава Кертіса і в ролях дїтей на сценї представлять ся члены Дїтьского фолклорного колектіву Ґайдошік зо села Нова Дєдінка.

 

Пять выступлїнь на выходї

Рутенія своє турне зачала в другій половинї новембра 2019 і представить ся в пятёх выходословацькых містах.

Дня 23-го новембра 2019-го року зачало турне в Пряшові, де ансамбель представить ся в просторах Театру Александра Духновіча, о день пізнїше на Землю обіцяну тїшыла ся кошіцька публіка в Театрї Талія. Першый децембровый вікенд буде мож відїти Рутенію в Левочі (6-го децембра) і почас слїдуючіх двох днїв у Свіднику і Старій Любовнї. Тікеты на турне дають купити ся через портал rezervovane.sk

Петро МЕДВІДЬ, ЛЕМ.фм

Script logo