1. 10. 2021: В словацькім парламентї бы могла выникнути ґрупа приятелїв меншын

Ініціаторы крітікують низку якость пропозіцій законів і несістематічность.

В Народнїй радї Словацькой републікы бы могла выникнути ґрупа приятелїв меншын. Рїшыти бы мала леґіслатівны пропозіції, котры дотуляють ся меншыновых вопросів, і припомінковати їх. Інформовала о тім аґентура TASR.

Выникнутя ґрупы про меншыны хотять ініціовати незарадженый депутат парламенту Мірослав Коллар і бывшый уповномоченый влады Словацькой републікы про ромскы комуніты Абел Равас. Хотять досягнути высшу якость леґіслатівы, котра дотулять ся меншын на Словакії.

Хотять верейну і одборну діскусію

„Задачов ґрупы буде приготовльовати становиска і припомінкы ку парламентным пропозіціям, котры мають досяг на меншыны, і пак їх продіскутовати з тов ґрупов релевантных депутатів Народной рады Словацькой републікы,“ пояснив Коллар з тым, же верейна і одборна діскусія є потрібна.

В сучасности подля нёго приготовлює ся леґіслатіва, котра дотулять ся меншын на „ad hoc базі“, хыбить продуманый і сістематічный приступ.

Равас додав, же ґрупа бы мала перед каждым засїданём Народной рады припомінковати окремы пропозіції, котры дотуляють ся меншын. Наслідно бы ся мала стрічати з контактныма депутатами і діскутовати з нима о припомінках. Ку співпраці ся за словами бывшого уповномоченого позывать каждый депутат парламенту, котрый має інтерес рішыти меншыновы темы через ціле політічне спектрум.

Коллар, котрый є сам депутатом, вірить, же в парламенті ся найдуть депутаты, котры інтересують ся о меншыновы вопросы.

Меншыны в парламентї не мають представителїв

Припоминаме, же по парламентных выборах, котры на Словакії проходили у 2020-ім роцї, першый раз в історії словацького парламенту не мають в нїм меншыны своїх представителїв в рамках даякого політічного субєкту.

Довгы рокы в парламентї здобывали мандаты мадярьскы політічны партії, по роцї 1998 то была зъєдинена Партія мадярьской коаліції (пізнїше змінена на Партію мадярьской комуніты), од 2010-го року была в парламентї партія Most-Híd, котра ся профіловала як субєкт, котрый просаджує інтересы нелем Мадярів, але і далшых меншын, а має намагу будовати односины і меджі маёрітов а меншынами.

Равас быв членом партії Мost-Híd. Перед часом з партії одышов по тім, што мадярьскы партії на Словакії, включно Most-Híd, оголосили замір злучіти ся до єдного політічного субєкту, котрый бы мав шансу вернути до парламенту. Коллар ся до парламенту дістав як член партії Za ľudí, яку основав бывшый презідент Андрей Кіска. З партії і депутатьского клубу по незгодах одышов. Минулый вікенд став председом мімопарламентной партії Spolu.

Петро МЕДВІДЬ, ЛЕМ.фм. Ґрафічна і языкова управа: ред. АРК в СР. Фотоґрафія: Dennis Jarvis / Wikipedia.