1. 1. 2021: Елена ХОМОВА-ГРІНЁВА: Послїднїй день в роцї, Вітай Новый рік, Моє вінчованя до нового року, Снїг (Стихы)

Елена ХОМОВА-ГРІНЁВА

Послїднїй день в роцї

Давно зашли
за горы вечурнї зорї.
Ниґде никого,
лем ТЫ і Я,
над головами тма.
Шырока дражка
місячком освітлена,
міліоны звіздочок
поздравляють нас з неба.
Обидвом зо щастя
хотїло ся танцёвати,
єден другого
понести на руках,
міцно обняти,
холодны воргы
в послїдню ніч
старого року
перед свідками
небес цїловати.

Вітай Новый рік

Вітай Новый рік.
Радостно о півночі
чекаме несмілого,
небісїдливого
жаданого гостя
до родин.
Вычачканы нашы
обыстя
блищачіма пантликами,
розсвітеныма світлами.
До каждой хыжы вкроч
правов ногов через поріг,
отваряме дверї
дошырока тобі.
З повной фляшкы
наливаме до погарів
перлистого вина.
Припиваме на щастя,
на здравя, на любов
надовго, на 365 днїв,
як найлїпше вєдно
пережыти день што день
в порозуміню з тобов.

Моє вінчованя до нового року

Вінчую Вам силну віру,
Боже пожегнаня,
певный крок в новім роцї
і чісте змышляня.

Вінчую вам добры односины,
бы сьте меджі собов мали,
вашы родины шувнї жыли
і ся нияк не гнївали.

Вінчую вам покій в домі,
де бы дїти отцїв і мамы мали,
жебы їх родічі в любови жыли
і ся не розваджали.

Вам, родічі, вінчую роботу,
бы сьте зарабляли,
што вам треба ку жывоту,
бы сьте собі куповали.

Вінчую вам, отцёве,
далеко за роботов
до світа бы сьте не одходжали,
але дома сьте ю находжали.

Вінчую нашым родинам
достаток вшыткого,
гойностёв хлїба на столах
і зерна в стодолах.

Іщі вінчую в тім роцї,
бы дїти на світ приходили,
бы стары ґенерації
молоды роды наградили.

А наконець, вінчую вам
добру мысель, добре одношіня,
покій і мір во світї, злагоду
і любов в нашых фамеліях.

Снїг
Прикрыли землю білы влочкы
як манна з неба,
снїжок падать на хотарь,
помалёваны білов фарбов
квіткы на замерзнутых облаках.
Мороз тріщіть, щіпе,
пхать ся за нїхтїі нам.
На дворї танцює мелузіна,
біла перина долов
сыпе піря з хмар.
Білїють ся снїгом хыжкы,
сады, лїсы, горы, скала,
цїлый наш любый край...