1. 1. 2020: «Обявліня». Бесіда зо специялистками про Енді Варголя і реліґію

Протягом выдатной і продуктивной карєры Енді Варголь так само представлял реліґійны темы, як і практикувал свою віру. Што інтересуюче, в істориі американьской штукы ХХ ст. реліґія є в великій мірі выключена. Сам Варголь был быти може по двакрат выключеный, як ґей і як християнин, достоменніст котрого в світі штукы і серед американьской соспільности додатково комплікували речены ідентичности.

Музей Енді Варголя в Пітсбурґу од осени минулого рока презентує выставу, котра комплексово аналізує віру Варголя в контексті його штукы. Християньскы мотивы часто выступували так само в явных, як і метафоричных формах цілой творчости артисты. Музей просит на бесіду зо специялистками про Енді Варголья і реліґію, котра є дополніньом выставы. Возмут в ней участ Еріка Дос, професорка американістикы на Унівеситеті Нотр Дам (штат Індияна), і Пауля Кейн, професорка реліґійознавства на Університеті Пітсбурґа. Дослідничкы думати будут над тым, што реліґія значыла для Варголя, як реліґійны віріня уформували і направили його штуку та чом реліґія «має значыня» в істориі американьской модерны.

Стріча з професорками Еріком Дос і Паульом Кейн пройде 9. січня/януара 2020 р. о 19.00 год. в Музею Енді Варголя в Пітсбурґу.

Наталія МАЛЕЦКА-НОВАК, ЛЕМ.фм

(Публікуєме в оріґіналї – лемківскім варіантї русиньского языка.)

Script logo