1. 1. 2017: В Пряшові представили лоґо ку Року Адолфа Добряньского

28-го децембра 2016-го року на 11.00 год. скликав до просторів Словацького сіндікату новинарів (Slovenský syndikát novinárov) пресконференцію Округлый стіл Русинів Словеньска (ОСРС). Председа русиньской платформы Мілан Піліп вєдно із пресовым говорцём Петром Медвідём познакомили словацькы медії з лоґом, котре буде медіалным лицем Рока Адолфа Добряньского.

Рік Адолфа Добряньского

 

О выголошіню юбілейного року вырїшыв ОСРС на своїм 18-ім засїданю, котре проходило в Пряшові 2-го апріля 2016-го року. Русины собі будуть в роцї 2017 припоминати 200-ый юбілей од народжіня вызначного русиньского народного будителя Адолфа Добряньского, котрый быв першым посланцём в Угорьскім сеймі за Вышнє Угорьско і як посланець в нім обгаёвав права Русинів і Словаків. О ёго приятельскім одношіню ку словацькому народу свідчіть і то, же быв єдным із основаючіх членів Матіцї Словеньской.

 

В рамках юбілейного року хоче ОСРС зорґанізовати актівности, котры будуть мати за задачу підняти інформованость о тій вызначній історічній особности міджі Русинами, но і цїлково в словацькім середовиску. Русиньска платформа буде так само коордіновати актівности прямуючі ку всокочіню родного дому А. Добряньского – старого будинку парафії в селї Рудлёв.

 

Події присвячены Добряньскому хоче платформа зробити в роднім Рудлёві, в селї Чертіжне, де є похованый і вєдно з Матіцёв Словеньсков і в Пряшові, де бы мала проходити конференція заміряна на різны спектры особности Адолфа Добряньского.

 

ОСРС так само апеловав нелем на членьскы, но і далшы орґанізації, села, котры роблять почас рока културны події, ці іншы актівности, жебы думали на то, же рік 2017 є юбілейный рік, і жебы так присвятили тоты події Добряньскому. Театер Александра Духновіча в Пряшові з той нагоды верне на свою сцену пєсу сучасного словацького драматіка Карола Горака під назвов Адолф Івановіч Добряньскый.

 

Лоґо юбілею

 

ОСРС з нагоды юбілейного року дало зробити і лоґо, котре бы мало быти медіалным лицём Року Адолфа Добряньского. Автором лоґа є молодый пряшівскый вытварник і ґрафік Домінік Бірош, якый ку нёму зробив і дізайн мануал.

 

Основна варіанта є синє лоґо на білім фонї. Ку тому ёствують далшы варіанты хоснованя і чорно-біла верзія. Лоґо обсягує якбач найзнамішый протрет Добрянського з роками 1817 і 2017 (датум народжіня і юбілею) і написами по русиньскы і по словацькы Рік Адолфа Добряньского – Rok Adolfa Dobrianskeho.

Лоґо будуть мати ку діспозіції вшыткы членове ОСРС, жебы го могли хосновати про нима орґанізованы події, ці про друкованя лоґа в періодічній або неперіодічній пресі ітд. Лоґо будуть годны хосновати і далшы орґанізації, котры о то проявлять інтерес, і котрым може быти наслїдно загнано вєдно із дізайн мануалом, котрый є треба дотримовати.

 

Петро МЕДВІДЬ